23 F

A SEGUNDA REPÚBLICA

Estamos a estudar a Segunda República española (1931-1936). Fracasada a ditadura de Primo de Rivera, o rei Afonso XIII tivo que convocar eleccións municipais o 14 de abril de 1931. Gañaron os partidos republicanos, o que levou a Afonso XIII ao exilio en Roma. Dende alí fixo varios intentos de recuperar a monarquía e antes de morrer, no 41, abdicou no seu fillo Juan (pai do actual rei de España).

Un goberno provisional convocou eleccións xerais a Cortes, coa intención de que se elaborase unha nova constitución.

Esta situación provocou unha gradual división de España en dous bandos, que acabarían enfrontándose na Guerra Civil.

Esta é a vosa tarefa:

1. Investigar sobre os partidos e os líderes políticos durante a Segunda República. Debedes relacionar os seguintes nomes cos partidos aos que pertencían:

• POLÍTICOS:  Lerroux, Calvo Sotelo, Azaña, Alcalá Zamora, Lluís Companys, Largo Caballero, Indalecio Prieto, Primo de Rivera, Gil Robles.
• PARTIDOS:  Izquierda Republicana, Falange Española, Partido Radical, Derecha Liberal Republicana, CEDA, PSOE, Esquerra Republicana, Renovación Española.

   2.  Quen foi o presidente da República na primeira etapa? A que tendencia política pertencía? E quen foi o presidente do goberno de coalición? A que tendencia pertencía?
   3.   Explica algunhas das principais novidades que presenta a Constitución de 1931.

CORREDORES DE SOMBRA

Comezamos a lectura de Corredores de sombra, unha das mellores novelas do máximo expoñente da literatura infantil e xuvenil galega actual, Agustín Fernández Paz. A narradora é Clara, unha muller próxima aos 30 anos, que rememora os acontecementos vividos no pazo dos Soutelo, a súa familia, cando ela tiña 16 anos. Por mor dunhas obras que se levan a cabo para modernizar o pazo, aparece un esquelete, envolto nunha alfombra, que presenta o cráneo furado por unha bala.

Estamos ante unha obra na que se mesturan temas como o primeiro amor, as relacións familiares, a amizade e o misterio, pero co telón de fondo da Guerra Civil española, e a posterior represión sobre os vencidos.