ATRANCOS CON FINAL FELIZ

Con dificultades e atrancos técnicos chegamos case sen darnos conta ao remate do curso. Esta é xa a entrada número 100. Si, parece imposible que pasasen tan rápido os meses desde aquel lonxano setembro en que emprendimos ilusionados esta aventura blogueira. Chegou o momento de avaliar o noso traballo, e digo o noso porque se vós algo aprendestes comigo, eu moito aprendín de vós, e tantas cousas descubrimos xuntos!

Nalgún intre pareceu que se perdían as forzas, pero finalmente foron recuperadas. Estas últimas semanas quedou ben demostrada a afirmación de Gandhi que elexín como lema do blog "A nosa recompensa atópase no esforzo e non no resultado. Un esforzo total é unha vitoria completa".

O esforzo pagou a pena. Agora podedes descansar no verán e pensar no voso futuro. Eu quedo aquí. Pensarei en vós, e sorrirei pensando nas vosas ocorrencias e nalgún que outro disparate!

Que sexades moi felices.

Nove bicos a repartir entre

Tania

Belén

David

Martín

Tino

J.J.

José Antonio

Pablo

e Sergio

AS TRECE ROSAS

Esta semana remataremos de ver e comentar a película Las 13 Rosas de Emilio Martínez-Lázaro que trata un dos episodios máis terribles da inmediata posguerra. Falamos da condena a morte e execución dun grupo de trece rapazas, sete delas menores (daquela a maioría de idade estaba fixada nos 21 anos). Estas mulleres, que pasaron á historia co nome das Trece Rosas, foron fusiladas nas tapias do cemiterio da Almudena o 5 de agosto de 1939.

No documental Del olvido a la memoria: Presas de Franco podemos escoitar arrepiantes testemuños da brutal represión franquista.

A GUERA CIVIL ESPAÑOLA

Imos comezar o estudo da Guerra Civil española, pero sodes vós quen debedes procurar a información. As primeiras cuestións que tedes que resolver son:

1. Que é unha república?
2. Cantos gobernos republicanos houbo en España?
3. Que é un golpe de estado?
4. Datas de comezo e remate da Guerra Civil.
5. Que países asinaron o chamado Pacto de non intervención?
6. Que países romperon ese pacto e a que bando axudaron?
7. A Falanxe.
8. A CNT.
9. Frente Popular.
10. As Brigadas Internacionais.
11. Que lle sucedeu ao escritor británico George Orwell na guerra?

BIOGRAFÍAS

Charles Chaplin e Albert Einstein

Imos realizar un estudo de varias personalidades moi destacadas do mundo da pintura, a música, a arquitectura, a física, a química, a historia, o cine e a literatura. O traballo consistirá en tres tarefas:

1. Buscaremos información e elaboraremos un resumo das súas biografías.
2. Localizaremos nun atlas o seu lugar de nacemento e debuxaremos un mapa para situalo.
3. Procuraremos unha imaxe do noso personaxe e escribiremos unha descripción literaria.
4. Finalmente, e xa en equipo, realizaremos unha liña do tempo no que situaremos as datas de nacemento e morte de cada un dos biografiados.

Os personaxes que imos coñecer con máis profundidade son:

• 
  
  Albert Einstein
• 
  
  Jules Verne
• 
  
  Ana Frank
• 
  
  Charles Chaplin
• 
  
  Vincent Van Gogh
• 
  
  Pablo Picasso
• 
  
  Marie Curie
• 
  
  John Lennon
• 
  
  Antonio Gaudí

Un consello: nunca empreguedes información atopada na rede sen contrastala antes. Ánimo e a traballar!

LETRAS E INTERNET

Como ben sabedes, hoxe 17 de maio celebramos en toda Galicia o Día das Letras Galegas. Este ano dedícase ao lucense Ramón Piñeiro polo seu activismo cultural e a súa loita polo uso do galego.

Pero a celebración é dobre pois hoxe tamén é o Día Mundial das Telecomunicacións e da Sociedade da Información, rebautizado como Día de Internet, en conmemoración desta mesma data de 1865 en que se fundou a Unión Internacional de Telecomunicacións. A celebración deste ano ten como lema "Protexer á infancia no ciberespacio".

A 2ª GUERRA MUNDIAL NO CINE (1)

Estes días estamos a estudar as causas, etapas e consecuencias da Segunda Guerra Mundial. Coñecida a teoría, pasamos á recreación cinematográfica de diferentes momentos clave no desenvolvemento dos acontecementos.
As primeiras recomendacións son Saving private Ryan (Salvar o soldado Ryan) de Steven Spielberg (1998) e The longest day (O día máis longo, 1962) de Annakin, Marton e Wicki, películas que recrean o Día D: o desembarco dos aliados na costa de Normandía.

O SOLDADO ALEMÁN IDEAL

Vía Ana Basterra, achegámonos ao magnífico blog Historiaenvideo para ver este documental sobre os "soldados xudeus de Hitler", unha mostra máis do sinsentido que se viviu na Alemaña nazi.

DÍA INTERNACIONAL DO LIBRO

Como todos sabedes, o día 23 de abril de cada ano celébrase o Día Mundial do Libro (e do Dereito de Autor). Esta celebración coincide en Cataluña coa Diada de Sant Jordi, día no que se agasalla ás persoas queridas con libros e rosas. Aínda que eu non son catalana (só no terreo deportivo!), quérovos dedicar un poema nesta data tan especial.

El hombre pequeñito

El hombre pequeñito

saludó al muy solemne,

sacó una servilleta

y dibujó un gran mapa

de su pequeña patria.

Puso en ella

barquitos de papel, colores, árboles,

unos peces azules

nadando en la mañana

y hasta un pájaro pinto.

El muy solemne extrajo

del profundo chaleco

dos soldados de plomo.

El pequeñito

recogió con cuidado

de no perder migaja

su patria servilleta

y se fue como vino.

El vencedor pestañeó perplejo

con sus sólidos párpados de palo.

(José Ángel Valente,

de Breve son (1953-1968)

REBELIÓN NA GRANXA

Este mes de abril, a biblioteca do cole centra o seu punto de interese na especial relación que existe entre a literatura e o cine. Cada un dos cursos vai traballar un libro e a súa adaptación cinematográfica.
A nosa obra será Animal farm (A revolta dos animais ou Rebelión en la granja ), unha novela satírica de George Orwell de 1945. Conta a historia dun grupo de animais que se rebelan ante a crueldade dos granxeiros e os botan da granxa. Crean un sistema de goberno propio que se convertirá nunha ditadura. Esta novela é unha sátira sobre a corrupción do socialismo soviético en tempos de Stalin, e sobre a corrupción do poder en xeral.
No seguinte enlace podemos ler o resumo do argumento capítulo a capítulo.
A película que veremos foi dirixida por John Stephenson en 1999, e está protagonizada por animais reais e polos chamados animatronics, é dicir, robots con apariencia animal.

A continuación podedes ver o comezo da versión en debuxos animados, dirixida en 1955 por Joy Batchelor e John Halas.

E un tema do grupo The Kinks titulado Animal Farm

MIRAR E VER

Retomamos as clases e comezamos este derradeiro trimestre cunha ferramenta de Google Earth: a visita virtual ao Museo de El Prado. Dixitalizáronse en alta resolución catorce importantísimos cadros. Isto permite observalos e estudialos con máis minuciosidade que no propio museo cunha lupa.

As obras dixitalizadas son as seguintes: Artemisa, Autorretrato, El 3 de mayo de 1808 en Madrid, El Caballero de la Mano en el Pecho, El Cardenal, El Descendimiento, El Emperador Carlos V, El Jardín de las Delicias, El Sueño de Jacob, Inmaculada Concepción, La Anunciación, La Crucifixión, Las Meninas e Las Tres Gracias.

A vosa tarefa consistirá, ademais de gozar desta experiencia única, en averiguar os nomes dos autores destas obras.